Pratique de la Roze de lestoille du Nord

L'usage de ladicte figure est double. Le premier est pour trouver les heures de la nuict, le second la desclinaison de l'estoille du nord. Quand à la premiere faut poser la lidade de minuit sur le jour du mois où lon sera, et la lidade des gardes sur le rumb de vent où se trouvera les gardes et icelle mesme lidade vous monstrera aux heures de la seconde rose, l'heure requise, Ce qui est sy facille à comprendre que jay jugé bestre poinct necessaire den donner des exemples. Second usage Faut poser la lidade de minuict sur la fleur de lis et la tenir ferme, et la lidade des gardes sur le rumb de vent où se trouveront les gardes, adonc la lidade de lestoille du nord vous monstrera à son extremité la desclinaison de la dicte estoille soit par dessus ou pardesous la hauteur du polle. Exemple Trouvant les gardes au ouest sud ouest, on desire scavoir la desclinaison de lestoille du nord, vous poserez lalidade de minuict sur la fleur de lis, et lalidade des gardes sur Ouest, sud Ouest, et vous trouverez que l'extremité de lalidade de lestoille du nord monstrera deux degrez vingt minuttes de desclinaison par dessus la hauteur du polle, laquelle desclinaison par ce qu'elle est pardessus la hauteur du polle doibt estre soustraicte et quand elle sera par dessoubs la hauteur du pole elle doibt estre adjousté. Par ceste table de desclinaison de lestoille du Nord, est suputée par degrez et minuttes. Sur les trente deux vents ceux qui sont au costé dextre, depuis l'Est Sud Ouest jusques au nordouest ¼ du Ouest ce adiouste acause que lestoille est lors pardessus le pole et au cote senestre ce doibvent soubstrire estant lors lestoille par dessoubs le Pole.