Traité de l'Hidrographie
Les commencemens de l'hidographie ou art de naviger avec la praticque des figures necessaires Il est bien difficile de scavoir sy les navigations anticques dont l'histoire saincte et les autres histoires profanes font mention estoient aussy parfaictes et s'ils s'aydoient des mesmes loix. Comme nous faisons aujourdhuy les oppinions des autheurs qui ont traicté desdits subiects sont differentes. Car les premiers disent quelle n'est pas vray semblable. Que les grandes navigations que faisoit faire le Roy Salomon et Hiram Roy de Sidon qui estoient de trois ans entiers ne se pouvoient faire sans une grande connoissance tant de l'astronomie que de la Geographie et de l'usage du Bussole. Car il est impossible de perdre long temps le veue de la Terre sans l'aide dicelle nestoit que le Ciel fust toujours visible ce quil nadvient poinct parquoy concluent que l'usage de la pierre daymant leur estoit congnue. Et que Slané natif de Melphe aupres de Naples na faict autre chose que de retrouver ce qui avoit esté enseney. Par l'ignorance du temps et disent Aristote avoir dit que les"autonniers" se servoient de la pierre daymant partant que le navigation anticque estoit semblable à la nostre. Les autres s'explicquent sur ceste oppinion que la navigation de Salomon tant célèbre ne soit autre chose qu'un embarquement qui se faisoit en la mer rouge à un port à un "lieu" nommé aujourdhuy "Sues". Et dela sen alloient tournoiant la coste d'AsFricques jusques au Cap de bonne Esperance et de la apportèrent ces grandes richesses dont il est parlé. Et que le long séjour qu'ils faisoient à chaque port leur faisoit consumer long espace de temps et par ce moien ne perdoient jamais la vue de la terre et de la jugèrent qu'il ne leur estoit necessaire davoir la connaissance de l'astronomie ny de l'usage du Bussole.