Exemple
: Ceste année mil six cens trente, Que nous avons seize depacte. On desire scavoir
en quel jour du mois daoust se fera la nouvelle lune, faut adiouster seize depacte
avec six, acause qu'aouest le sixiesme depuis mars. Faict vingt deux qui se
soubstraicts de trente reste huict qui monstre que le huitiesme jour du mois
daoust ce sera la nouvelle lune. La seconde partie est de trouver laage de la
lune en combien il y aura que la pleine lune ce sera faicte pour ce faire faut
adiouster le nombre des mois depuis mars avec lepacte et le nombre des jours
du mois et ce qui viendra ce sera le nombre des jours de la lune que sy ledit
nombre exedde trente faudra prendre seullement ce qui sera pardessus / KExemple
Le trieziesme jour du mois d'aoust de ceste année mil six cens trente. Je desire
scavoir combien nous aurons de jours de la lune. Jadiouste six mois quil y a
depuis mars avec seize depacte que nous avons ceste année. Faict vingt deux.
Avec lesquelz Jadiouste quinze du mois le tout faict trente sept. Je oste trente
reste sept. Parquoy Je dis que le quinziesme jour du mois d'aoust, nous aurons
sept jours de la lune, Or scachant comme dessus le jour de la nouvelle lune
Il sera aysé de scavoir quand advient le premier quartier dicelle, la pleine
Lune et le dernier quartier. Car adioustant sept au jour de la nouvelle lune
Viendra le jour du premier quartier et sy on adiouste quinze Viendra la pleine
lune et sy vingt Ung viendra le dernier quartier. / Mai est à notter que ces
choses sont fort "fundiues" advenant quelque fois. Un jour plus ou moins. Aussy
est vray qui veut avoir ces choses precisement ne les recherche comme dessus,
ains par supputations astronomiques ou dedans les Ephemerides dressées et calculées
pour ce temps là Jay mis icy quelques tables des nouvelles lunes calculées sur
les observations de Ticobrahe pour le temps et espasse de vingt cinq ans comancant
en ceste année mil six cens trente.