Pour juger les marrrees en tous havres. Cest à dire scavoir lheure de la pleine mer sy ce lieu nous permettoict de nous estendre, on pourroit icy philosopher de la cause du flus et reflus de la mer Mais à raison que cest question est assez agitée par les escoles des philosophes Joinct que cela ne nous serviroit de rien Nous laisserons ceste matiere à descouvrir à dautres, Pour trouver lheure de la pleine mer : faut trouver la scituation du havre que nous apprendrons par la table apres mise puis congnoistre laage de la lune et les reduire en heures par les reigles cy devant enseignez alors lheure de la pleine mer se trouvera en ceste sorte. Faut adiouster Ensemble les heures de laage de la lune avec les heures de la scituation du havre et le tou sera lheure de la pleine mer.Exemple : A Dieppe le quinziesme jour d'aoust mil six cens trente vous trouverez par les reigles cy devant mises que nous aurons ledit jour 37 jours de la lune. Il en faut oster 30 reste 7 jours de la lune qui vallent cinq heures ½ 6 m. Vous trouverez à la table cy apres mise que le havre de dieppe est au Sud SudEst qui vaut dix heures ½ avec lesquels faut adiouster cinq heures 6m. le tout faict quinze heures 6.M dont Il en faut oster douze heures Reste trois heures six minuttes qui sera lheure de la pleine mer ledit jour au havre de Dieppe / Ledit jour quinziesme aoust mil six cens trente Lon desire scavoir à quelle heure Il sera pleine mer au havre de grace. Nous avons trouvé que nous avions ledit jour sept jours de lune qui est au SudEst qui vaut neuf heures avec lesquels Jadiouste cinq heures ½ minuttes le tout faict 14 heures ½ 6 M dont jen oste 12 heures reste deux heures ½ 6 M pour lheure de la pleine mer au havre de grace ledit jour et ainsy faire de tous les autres.